بدر بانون يكشف تفاصيل لأول مرة عن انتقاله للأهلي: ”احسن حاجة حصلتلي”
كشف بدر بانون مدافع الفريق الأول لكرة القدم بالنادي الأهلي، تفاصيل انتقاله للمارد الأحمر ومشاركته مع الفريق في كأس العالم للأندية.
وكان الأهلي تعاقد مع المدافع المغربي الدولي في الانتقالات الصيفية الماضية قادما من نادي الرجاء المغربي.
وقال بدر بانون في تصريحات تلفزيونية عبر شاشة قناة الأهلي عن انتقاله للأحمر: انا كنت طالع على فريق اسيوي ، بس جالي اتصال من وكيل مغربي ، قالي انت تحب تلعب للاهلي قلتله طبعاً ، والحمدلله انا فخور بتواجدي هنا في الاهلي.
وأضاف: احسن حاجة جت هي عرض النادي الاهلي ، الكل عارف قيمته وانا هنا بقالي شهرين ونص ومعايا كاس مصر وبرونزية كاس عالم ، ولسه قدامنا كاس سوبر افريقي ومصري ودي حاجة مبتحصلش غير في فريق زي النادي الاهلي
تابع: الحمدلله ارقامي كويسة ، لكن الارقام دي بدون زمايلي مكنتش هقدر اعملها و دي بتبقى حاجات شخصية ، لكن الاهم ليا هو فريقي لو فاز النادي الاهلي بالمركز الثالث اهم ليا من الارقام.
وفي سياق متصل أوضح: انا معنديش اي حسابات على فيسبوك او تويتر ، معنديش غير حساب عبر انستجرام وموثق ، عشان في ناس كتير بتستغل اسمي وعاملين صفحات على فيسبوك وتويتر وبتتكلم بإسمي
وأتم بانون تصريحاته: في المغرب ملقتش حد واقف جنبي وخصوصاً الصحفيين ، بل بالعكس لو عملت حاجة وحشة تلاقي الناس في المغرب اول اللي بيهاجموني انا كنت زعلان شوية ، لكن قعدت مع نفسي وحطيت هدف قدامي.. اللي عايز يتكلم عليا وحش او حلو يتكلم.
واختتم؛ انا فضلت مركز في كورتي وناجح في مسيرتي والميدالية دي ماخدتهاش من فراغ ، انا حققت حاجات كتير في مسيرتي وماشي في الطريق الصحيح ، وانا مسامح اي حد غلط فيا ، بس عايز اعرف هما مسامحين نفسهم ولا لا .
